Մենք կարևորում ենք երկարաժամկետ և հետևողական աշխատանքը համայնքներում՝ ապահովելու համար կայուն ազդեցություն և կերտելու հզոր համայնքներ:
Կազմակերպությունն իր առաջին քայլերը սկսել է Շիրակի մարզի 70 գյուղական համայնքներից ՝ իրականացնելով հիմնականում ընտանիքի պլանավորման, առողջ ապրելակերպի, ՄԻԱՎ/ՁԻԱՀ-ի կանխարգելմանն ու կանանց իրավունքներին ուղղված ծրագրեր։ Մարզի գյուղական համայնքներում աշխատանքի գրեթե 10 տարվա փորձառությունը, իրազեկվածությունը բնակիչներին հուզող խնդիրներին և կազմակերպության հանդեպ ձևավորված վստահությունը հիմք հանդիսացան մեր աշխատանքի նոր մոտեցումների մշակման համար։ Եվ ահա 2008թ-ից «Կանայք հանուն զարգացման» ՀԿ-ն մեկնարկեց համայնքների զարգացմանն ուղղված համակարգված գործունեություն Շիրակի մարզի գյուղական համայնքներում` որպես սկզբունք ունենալով «Ոչ թե համայնքի համար, այլ միասին՝ հանուն համայնքի» կարգախոսը։ Շահառու համայնքներում մեր աշխատանքի հիմնական հաջողությունը հենց այս մոտեցման մեջ է։
1998-2014թթ-ին կազմակերպությունն աշխատել է Շիրակի մարզի 70 գյուղական համայնքներում, իսկ 2014թ-ից առ այսօր ակտիվ և հետևողական աշխատանք է տանում Շիրակի մարզի 12 համայնքներում։ Կազմակերպության շահառուներն են նշված համայնքների ավելի քան 7610 բնակիչները՝ ՏԻՄ ներկայացուցիչներ, երիտասարդներ, դպրոցականներ, համայնքի ակտիվ անդամներ։
*ԿՀԶ ՀԿ շահառու համայնքների ինտերակտիվ քարտեզի վրա կարող եք գտնել տվյալ գյուղերի մասին համառոտ պատմական ակնարկ և ԿՀԶ ՀԿ կողմից իրականացված ծրագրերի մասին ամփոփ տեղեկատվություն։
Կազմակերպության շահառու համայնքներն են ՝ Սարապատ միավորված համայնքի 8 բնակավայրեր, Կրասար, Կարմրավան, Սարագյուղ, Նոր Կյանք, Տուֆաշեն, Վարդաքար, Նահապետավան, Անուշավան, Լեռնակերտ, Լանջիկ և Մեղրաշատ
Ծրագրի համայնքային զարգացման բաղադրիչն ունի մեկ հիմնական նպատակ՝ տեղերում ձևավորված ակտիվ խմբերի աջակցությամբ բարձրացնել համայնքներում ապրող բնակչության կյանքի որակը։
Դուրս գալով փորձից, կազմակերպությունը մշակել է համայնքների հետ աշխատանքի իր սեփական, արդյունավետ մոտեցումներն ու մեխանիզմները, որի արդյունքում վերջիններս դարձել են ավելի ուժեղ, համախմբված և կարողանում են ինքնուրույն վերլուծել ու գնահատել իրենց կարիքներն ու հնարավորությունները։
Համայնքների զարգացմանն ուղղված հիմնական քայլերն են՝
- – Համայնքի համախմբում,
- – Մասնակցության բարձրացում,
- – Համայնքի անդամների կարողությունների զարգացում,
- – Տեղի խնդիրների վերհանում և լուծում,
- – Տեղական բիզնեսի և սոցիալական ձեռներեցության խթանում,
- – Կոնֆլիկտների կառավարում։
Կազմակերպությունը մշակել է համայնքներում իրականացվող աշխատանքների հստակ քայլեր, որոնք բաժանվում են երկու հիմնական մասի։
Առաջին մասը նախապատրաստական աշխատանքներն են, որոնց հիմքում տեղի բնակչության կարողությունների զարգացումն է՝ մասնակցության, կամավորության և համայնքի համախմբման խթանումը, սեփական համայնքի խնդիրները սեփական համայնքի խնդիրները բացահայտելու և ներկայացնելու ունակության զարգացումը:
Աշխատանքների երկրորդ մասն արդեն բուն, գործնական աշխատանքներն են՝ սոցիալական հիմնախնդիրների լուծում, ֆինանսական աջակցություն տեղերում ձևավորված ակտիվ խմբերի կողմից ներկայացված այս կամ այն ծրագրի իրականացման համար, ձեռներեցության խթանում և աջակցություն փոքր բիզնեսներին: Ինչպես նաև հնարավոր ֆինանսական և տեխնիկական աջակցություն ապահովելու նպատակով՝ շահառու համայնքների խնդիրների ներկայացում պոտենցիալ դոնորներին և գործընկեր կազմակերպություններին։
Աշխատանքի նման մոտեցման արդյունքնում այսօր արդեն տեսանելի դրական փոփոխություններ կան շահառու բոլոր համայնքներում: Հաջողությամբ իրականացված ավելի քան 84 սոցիալական ծրագրերի արդյունքում լուծվել են երեխաների, երիտասարդների և մեծահասակների ազատ ժամանակի արդյունավետ կազմակերպման հարցեր: Մասնակիորեն լուծվել են համայնքային ենթակառուցվածքների՝ այդ թվում փողոցային լուսավորության, հանդիսությունների սրահների վերանորոգման ու կահավորման, հանրային կանգառների տեղադրման, մշակութային խմբակների ձևավորման, սպորտի և առողջ ապրելակերպի զարգացման հետ կապված մի շարք խնդիրներ։ Սոցիալական ծրագրերի իրականացման ամենակարևոր արդյունքը տեղական ինքնակառավարման, համայնքի բնակչության և կազմակերպության միջև վստահության ամրապնդումն է։ Ոչ մի ծրագիր համայնքներում չի իրականացվում առանց տեղական իշխանության ֆինանսական ներդրումների, իսկ այն ծրագրերը, որոնք ներառում են շինարարական և վերանորոգման բաղադրիչ, ամբողջովին իրականացվում են տեղի կամավորների ջանքերով և վերահսկվում համայնքապետերի կողմից։
Շահառու 4 համայնքում հիմնվել են համայնքահեն հասարակական կազմակերպություններ: Նրանք արդեն կատարում են ինքնուրույն առաջին քայլերը՝ ձևավորելով որոշակի դրական միջավայր և վստահություն հաղորդելով հատկապես բնակչության առավել երիտասարդ հատվածին։ Սա երիտասարդներին սեփական համայնքում պահելու, գործունեություն ծավալելու, սեփական գաղափարներով հանդես գալու և համայնքային խնդիրների լուծմանը մասնակցություն ապահովելու լավագույն ձևերից մեկն է, որը շնորհիվ ԿՀԶ ՀԿ-ի, այլևս իրողություն է։
