Մենք կարևորում ենք ֆորում թատրոն խմբակների գործունեությունը՝ ոչ ֆորմալ ճանապարհով համայնքներին հուզող հիմնախնդիրները վեր հանելու և դրանց լուծմանը համայնքի անդամներին մասնակից դարձնելու գործում։
Աշխարհը ճանաչելու լավագույն միջոցներից մեկը արվեստն է: Արվեստի ազդեցությունը մարդու վրա լայն է, ունի տարբեր գործառույթներ և նպատակներ, որից հիմնականը կրթականն է: Թատրոնը՝ ասելիքը տեղ հասցնելու այլընտրանքային, հիշվող, էմոցիոնալ առումով առավել տպավորիչ ու ազդեցիկ միջոցներից է: Հենց այս հանգամանքն էլ հաշվի առնելով «Կանայք հանուն զարգացման» ՀԿ-ն 2015թ-ից սկսեց կիրառել ինտերակտիվ թատրոնը կամ որ նույնն է՝ ֆորում թատրոնը, որպես կոնֆլիկտների կառավարման այլընտրանքային մեթոդ: Փորձնական ծրագրի իրականացման համար ընտրվեց Թորոսգյուղ համայնքը, որտեղ ձևավորվեց 15 հոգուց բաղկացած խմբակ։ Ֆորում թատրոն խմբակը նպատակ ուներ այս մեթոդի կիրառմամբ համայնքների դեռահասների ու երիտասարդների միջոցով բարձրաձայնել և գտնել լուծումներ իրենց հուզող խնդիրների վերաբերյալ։ Առաջին ներկայացումը, որ Թորոսգյուղի Ֆորում թատրոնի խմբակը ներկայացրեց հանդիսատեսի դատին, ընդունվեց մեծ ոգևորությամբ և հետաքրքրությամբ։ Հաշվի առնելով դրական արձագանքները՝ որոշվեց Թորոսգյուղի փորձը ներդնել նաև շահառու այլ համայնքներում։ Այսօր արդեն 8 համայնքներում գործում են Ֆորում թատրոն խմբակներ, որոնցում ներգրավված են 12-16 տարեկան ավելի քան 230 երեխա։
Բոլոր ներկայացումների մշտական հանդիսատեսն են ուսուցիչները, ծնողները, դպրոցականներն ու համայնքի անդամները, ովքեր ակտիվորեն ներգրավվում են բեմականացումներին, փոխարինում «դերասաններին» և խնդիրների լուծման իրենց տարբերակներն առաջարկում։
Ֆորում թատրոնի անդամները ներկայացումների միջոցով բարձրաձայնում են ներանձնային և միջանձնային խնդիրներ, ներդպրոցական և ներհամայնքային կոնֆլիկտներ, բնապահպանական և համայնքին հուզող տարատեսակ հարցեր: Ներկայացվող նյութն այնուհետև տեղում քննարկվում է հանդիսատեսի հետ: Սա լավագույն հարթակն է, որտեղ նյութի ներկայացմանը տրվում է գեղարվեստական երանգավորում, իսկ հարցի լուծումը գտնվում է բազմակարծիք քննարկման արդյուքում: Ֆորում թատրոնի խմբակները օգնում են դպրոցականներին ազատ և անկաշկանդ հայտնել իրենց կարծիքը, բարձրաձայնել իրենց հուզող հարցերը: Ուսուցիչն ու ծնողը ոչ ֆորմալ միջավայրում հնարավորություն են ստանում մասնակցել երեխային հուզող խնդիրներին և համատեղ փնտրել լուծման այլընտրանքային ճանապարհներ:
Բեմի անտեսանելի 4-րդ պատը, որը ոչ թե բաժանում, այլ միավորում է դերասաններին ու հանդիսատեսին, հնարավորություն է տալիս աշակերտին ու ծնողին փոխվել դերերով: Ֆորում թատրոնն օգնում է գնահատել անկեղծությունն ու արժևորվել ազատ խոսքը։
ԿՀԶ ՀԿ կողմից կազմակերպվել են նաև Ֆորում թատրոն խմբակների փոխայցելություններ այլ համայնքներ, ինչը մասնակիցներին հնարավորություն է տվել փորձի փոխանակման, ինչպես նաև այլ համայնքներում առկա խնդիրները տեսնելու համար։
«Այստեղ ես դարձա ընկերասեր, համարձակ, նախաձեռնող: Ես այստեղ ավելի անկեղծ եմ, քան տանը մայրիկիս հետ, այստեղ ես հասկացված եմ…» ,- Սրանք կոնկրետ երեխայի խոսքեր են, որոնք խոսում են ֆորում թատրոնի դրական ազդեցության մասին։
